Despollucion, ua necessitat e… ua ressorça?

Se las activitats umanas produsissen un sarròt de substàncias quimicas organicas e inorganicas, la gestion de las aigassas que permet de redusir la pollucion e de tornar utilizar l’aiga. Mes totas las aigas polluidas ne passan pas per ua estacion d’epuracion e la despollucion qu’a limits. Depuracion naturau o autodepuracion Los arrius qu’an ua bona…

Per Anne-Pierre Darrées
Estacion de depuracion de Fermanville
Estacion de depuracion de Fermanville (lagunatge), Wikipédia

Se las activitats umanas produsissen un sarròt de substàncias quimicas organicas e inorganicas, la gestion de las aigassas que permet de redusir la pollucion e de tornar utilizar l’aiga. Mes totas las aigas polluidas ne passan pas per ua estacion d’epuracion e la despollucion qu’a limits.

Depuracion naturau o autodepuracion

Los arrius qu’an ua bona capacitat d’autoepuracion. Per exemple, bacterias que van eliminar polluents organics biodegradables (compausats carbonats coma las proteïnas o lo sabon, compausats azotats coma l’urèa…). Mes lo procediment que necessita zònas sense tròp de corrent tà favorizar la decantacion e zònas plan oxigenadas, sauts d’aiga per exemple. E, de segur, que cau petitas quantitats de polluents.

Las paishèras1 hèitas per vibres2 que participan ad aquera autoepuracion.

Totun, aquera autoepuracion ne sufís pas.

Tecnica: la revolucion deus quimistas Ardern e Lockett

Cloaca maxima

Cloaca maxima, construsit de cap a 600 ab. J.-C. a Roma, Wikipedia

Se los Romans construsivan canèrs coma la famosa cloaca maxima, en França, que cau aténer lo movement  igienista du sègle XIXau tà construsir hialats de canèrs enterrats. Tot prumèr, que collectavan las aigas corrompudas e las aigas de ploja – que començaram a las separar en 1960 – e que las barrejavan3 sus camps (5 000 ha tà París en 1900).

En 1914, los quimistas anglés Edward Ardern e William Lockett que descobriscon que la despollucion ei mès rapida quan l’aiga corrompuda ei en contacte dab ua biomassa (mesclada de microorganismes) dejà formada. Que serà lo prumèr procediment dit de hangas activadas4. Melhorat, que serà la basa de las estacions de depuracion5 construsidas sustot a partir de las annadas 1970.

 

 

 

Depuracion de las aigassas urbanas

Las aigassas urbanas que contenguen las aigas deus comuns (urinas, matèrias fecaus), de las salas de banh, de la preparacion deus aliments, de las bugadas, e tanben las aigas deus talhèrs d’artisans, de las petitas industrias, deus comèrcis. Que representan  enter 150 l/j/abitant e 400 l/j/ab (en França, la mejana qu’ei a 200 l/j/ab).

Principi de foncionament d'ua estacion de depuracion

Principi d’ua estacion de depuracion, ©France épuration

Que las caraterizam mercés a paramètres globaus coma la tenor en matèrias en suspension (MES) qu’ei a díser la quantitat de matèrias retengudas per un filtre de 1,2 µm, o la demanda biologica en oxigèn en 5 jorns (DBO5) que representa la quantitat d’oxigèn consumida per bacterias tà degradar la matèria organica biodegradabla pendent 5 jorns. Que las caraterizam tanben dab compausants particulars: azòt Kjeldahl (NK), fosfòr (P), lipids, tensioactius, etc.

Lo tractament classic qu’ei constituit d’un tractament

  • Primari (decantacion, desen·hangatge6: que permet un abatement de 50 % a 70 % de las MES e de 20 % a 40 % de la DBO5.
  • Segondari: que neurim bacterias dens un bacin mercés a las aigassas e qu’aumentam la quantitat d’oxigèn dab turbinas; que parlam de bacin d’aeracion. Qu’ei seguida d’ua decantacion dita segondària tà separar las aigas epuradas de las hangas (MES concentradas). Lo taus de depollucion qu’ei de 90% de la pollucion organica totau.
  • Terciari: a còps, qu’ajustam un tractament que permet ua despollucion espcifica coma ua desnitrificacion e ua desfosfatacion a Saint-Germain-en-Laye o a Strasbourg.

Las hangas, primàrias e segondàrias que seguissen un tractament particular que pòden conténguer un espessiment, ua digestion, un compostatge, ua desidratacion, ua incineracion…

En França que produsim 1,8 milion de tònas de matèrias eishugas7 de hangas, ua mitat que veng de las estacions urbanas, l’auta des las estacions industriaus.

La situacion mondiau

Segon un estudi de 2021, 63% de las aigassas urbanas que son collectadas, 52% son tractadas, 11% son reutilizadas (sustot en Africa deu Nòrd, Euròpa occidentau e Orient Mejan). Atau, quasi la mitat de las aigassas tornan aus arrius sense tractament. En França, 23 000 estacions que receben 82% de las aigassas urbanas, de las quaus 67% an ua eficacitat confòrma a las exigéncias europèas; los 18% que demoran passan per equipaments individuaus.

estacions de depuracion peu monde

Estacions de depuracion, ©essd.copernicus.org

Totun, l’eficacitat d’ua estacion que depend de la bona causida de la cordera de tractament, de condicions extèrnas e de la competéncia tecnicia deus emplegats (formacion, sosteng d’especialistas). Per exemple, las estacions sus Ganges ne tractan pas daubuas dèishas toxicas coma los metaus pesucs; las copaduras frequentas de corrent que paralisan lo lor foncionament e 30% de las estacions que’s tapan8 pendent las monsons9; enfin, l’enterteng qu’ei sovent insufisent.

La cordera de tractament n’ei pas de bon causir. Per exemple, l’estacion Jean-R.-Marcotte de Montreal que recep e tracta 50 % de las aigassas de Quebèc: 2,7 milions de m3/j per temps sec e dinc a 7,6 milions de m3/j per temps de ploja. Aquera dilucion ne permet pas de neurir ua biomassa. Alavetz, dinc adara, l’estacion n’avèva pas qu’un tractament primari. En 2026, que son a construsir ua unitat de desinfeccion dab ozòn (ozonation en francés) tà destrusir los micròbis e las moleculas organicas.

Generaument, quan las aigassas ne son pas corrèctament tractadas, d’ua part los polluents que demoran retròban lo mitan naturau, d’auta part, los agents patogèns que contenguen contaminan l’aiga de susfàcia e, adonc10, l’aiga bevedera, en favorizar la propagacion de malautias idricas. 

Utilizar cada gota d’aiga mès d’un còp

La reütilizacion de las aigassas tractadas, dita REUT o reuse, lançada dens las annadas 1980, que demora marginau sustot en Euròpa: 1% en França, 8% en Itàlia, 14% en Espanha. Que sofrís d’un hasti11 de la populacion.

Totun, quauques país qu’an passat lo saut: Australia, California, Espanha (hèra de projèctes), etc. Israel, per exemple, que reutiliza mès de 85 % de las aigassas tà l’agricultura, coma d’autes país eishucs12. Que demanda ua bona mestresa deus tractaments e ua susvelhança de la qualitat. En Euròpa, un reglament de 2020 que fixa aqueras exigéncias.

microfiltracion de las aigassas, usina Bedok NEWate, Singapor

Microfiltracion de las aigassas, usina Bedok NEWate, Singapor, ©sciencesetavenir

Singapor que hè referéncia dens lo domèni. Que hèn un complement de tractament de haut nivèu a las aigas que sortissen de las estacions de depuracion: filtracion, osmòsi invèrsa, radiacion UV, remineralizacion (pr’amor l’aiga qu’ei tròp pura). Aquera Newater qu’alimenta l’industria electronica e de produccion d’energia e tanben lo hialat d’aiga bevedera.

En quauques país coma Australia, desempuish 2017, la REUT que permet tanben de tornar cargar las jaças freaticas. La vila de Perth, de 2 milions d’abitants, que creish hèra viste, mentre que las precipitacions annaus an baishat de haut o baish 20 % pendent las darrèras 50 annadas. Dab las usinas de reciclatge avançat de l’aiga, que produsissen adara 28 milions de m3 per an (programme Water Forever – Whatever the Weather).

En França, Porcairòla qu’utiliza las aigassas tractadas desempuish 1980, Noirmoutier tanben tà cultivar las suas famosas mandòrras13. Mes recentament, l’associacion ASA Limagne Noire qu’emplega las aigassas tractadas de Clarmont d’Auvèrnhe.

Dab lo creish demografic e lo rescauhament climatic, los país e las vilas que s’i interessan mès anar mès seriosament. Clairà (Calalonha francesa) que vòu lutar contra la sequèra. França qu’a un “plan aiga 2023” (53 mesuras); que permeterà, au demiei d’autas causas, de tornar cargar las jaças sosterranhas pròchas de las mars e atau de hèr puishèu14 a l’aiga de mar que i entra uei.

Quauquas innovacions

La situacion actuau que lhèva idèas navèras e innovacions. Per exemple:

Joen indians ganhan un prèmi

Avyana Mehta, Vivaan Chhawchharia e Ariana Agarwal, ©thereelstars

Plas-stick

Los estudiants indians de 16 ans, Vivaan Chhawchharia, Ariana Agarwal et Avyana Mehta, que venguen de recéber lo Earth Prize 2026 tà la descobèrta d’un floculant de granas de tamarin: dens l’aiga, la prova qu’atira las particulas plasticas e fòrma conglomerats de bon véser que podetz cuélher dab un asimant. Ua solucion tà las personas que beven aiga estocada dens cistèrnas.

Biochar

SUEZ e PYREG que perpausan ua solucion de pirocarbonizacion entà produsir biochar a partir de las hangas de depuracion. Lo biochar que permet de sequestrar durablament lo carbòni present dens las hangas e d’abonir15 los sòus. Que pòt tanben melhorar los materiaus de contruccion en redusir la lor marca carbòni.

Qu’ei lo cosin de la tèrra negra d’Amazonia, mesclada preparada peus abitants desempuish mès de 2000 ans.

Depuracion de las aigas industriaus

Las aigas residuaus industriaus que son sovent irregularas: composicion, debit dens la jornada, etc. La lor diversitat que necessita un estudi de cada establiment e sovent procediments especifics. Per exemple, la demanda biologica o quimica en oxigèn dens las industrias alimentàrias qu’ei 10 a 100 còps mès grana que dens las aigassas urbanas, las tanerias que gètan cròme, lo lavatge de las lans (laines) grèishas e saus organicas, los talhèrs de pintrura metaus pesucs (plomb, cadmi, cobalt…), etc.

Ne coneishem pas lo taus de depuracion de las aigassas industriaus dens lo monde. L’ONU que l’estimava a 20% en 2024. Qu’ei pauc mes qu’atendem un doblament dens los 10 ans, devut au creish de las politicas environamentaus, e ua demanda hòrta en Asia.

En França, la reglamentacion, de las quaus l’arrestat de 1998 sus las installacions classadas, qu’enquadra los regets. Un estudi de INERIS, publicat en 2016, que muishèc qu’un quart deus regets industriaus passavan los lindaus autorizats per ua o mès d’ua substància. Totun, enter 2008 e 2024, las emissions de niquèl dens l’aiga qu’an baishat de 52%, las de l’arsenic de 78%.

La REUT

Hèra d’enterpresas que favorizan la reutilizacion (REUT) de las aigas deus procediments tà diminuir los regets. Qu’ei adara ua practica usuau.

De mès, la tendéncia actuau que privilegia lo “zèro reget liquid” sustot dens lo textile, l’energia e l’industria farmaceutica. Per exemple, l’usina Al-Baha for caustic and Chlorine industry qu’a construsit en 2025 la prumèra unitat d’aqueth tipe en Jordania. Que tornan utilizar los aigassas que venguen de la produccion de soda e de clòr, après tractament, dens los lors procediments.

Depuracion de las aigas agricòlas

Filtre de sable sus drens

Filtre de sable sus drens, ©lactualite.com

A còps, las aigassas deus neurissatges16 que son depuradas sustot quan son installacions classadas; las de l’irrigacion, rarament. Çaquelà, qu’existís bonas practicas de proteccion deus arrius. En França, ua nòrma Bonas Condicions Agricòlas et Environamentaus (BCAE), que demanda ua benda d’èrbas o d’arbos de 5 mètres de larg (o mès segon las situacions) tot lo long de l’arriu tà limitar la pollucion de l’arriu e protegir los sòus de las erosions.

Procediments de tractament de las aigas agricòlas que començan d’aparéisher. Per exemple, l’arriu Châteauguay (Quebèc) qu’a concentracions de pesticides 1 000 còps tròp hautas tà la subervita de daubuns organismes aquatics. Un filtre de sable installat en 2025 suus drens que permet de reténguer 90% deu fosfòr e de las matèrias en suspension (MES).

 

L’estacion de Dèlta Navèth

Mès ambiciosa, Egipte que vòu melhorar la securitat alimentària deu país. Atau, que construsissen en 2023 l’estacion de depuracion de Dèlta Navèth a El Dabaa. Que tracta 7,5 milions de m³/j d’aigassas agricòlas, çò que permet de despolluir lo lac Marriot e lo litorau mediterranèu d’Alexandria e d’aufrir tèrras drenadas de hauta qualitat.

Que contribua tanben a atenuar lo cambiament climatic dens la zòna deu dèlta en desviar los aigats responsables de l’abaishament de las tèrras e en redusir la quantitat d’aiga d’irrigacion que veng deu barratge haut. Qu’ei l’estacion de depuracion mès bèra deu monde.

Projècte d'estacion de depuracion de Dèlta Navèth a El Dabaa

Projècte d’estacion de depuracion de Dèlta Navèth a El Dabaa, ©The Arab Contractors

Conclusion

L’evolucion que nos pòrta pollucions navèras e totjorn mès importantas. La despollucion qu’ei un maine recent e globaument hòrt en retard. De mès, a còps, las tecnicas que son complicadas e caras, o insufisentas.

Urosament, centres de recèrca deus grans coma lo soïsse Eawag, lo suedés SWIC, lo francés Veolia, o coalicions coma Global Water Research Coalition (dab lo francés CIRSEE, l’alemand TZW…) que pòrtan solucions taus procediments de despollucion e tanben tà la susvelhança e la modelizacion (utís de data science), etc. Aqueras innovacions que transfòrman drin a drin la vision de las aigassas: d’ua dèisha a tractar cap a ua ressorsa estrategica en aiga, energia e matèrias, dab implicacions hòrtas entà la resiliéncia urbana, l’agricultura e la santat publica.

Totun, despolluir ne deu pas estar ua desencusa17 tà polluir. La melhora pollucion que demora la que ne cream pas.

Dossièr aiga doça:

  1. L’aiga sus la planeta: Vam mancar d’aiga?
  2. L’uman qu’emplega aiga doça: Las aigas tiradas son de bona qualitat?
  3. La qualitat quimica de l’aiga: Las activitats umanas son responsablas de la pollucion?
  4. La despollucion: Despollucion, ua necessitat e… ua ressorça?
  5. La qualitat biologica de l’aiga: L’aiga portaira de malautias?

Referéncias

Maxime Zucca, Baptiste Morizot, Brice le Maire, Réparation des cours d’eau basée sur les processus mimant l’action des castors, principes et exemples dans la Drôme, 2024.

Edward R. Jones, Michelle T. H. van Vliet, Manzoor Qadir, and Marc F. P. Bierkens, “Country-level and gridded estimates of wastewater production, collection, treatment and reuse”, 2021.

Julie Mendret, La réutilisation des eaux usées traités pour l’agriculture en Europe et en Australie, 2025.

  1. barrages
  2. castors
  3. déversaient
  4. boues activées
  5. stations d’épuration
  6. débourbage
  7. matières sèches
  8. se bouchent
  9. moussons
  10. par conséquent
  11. répugnance
  12. arides
  13. pommes de terre
  14. empêcher
  15. amender
  16. élevages
  17. excuse
Posted in ,