L’IA dens la medecina

Mès anar mès l’Intelligéncia Artificiau (IA) s’impausa dens lo domeni de la medecina. E dab lo projècte chinés d’espitau gavidat per IA (espitau-IA), que podem parlar d’ua rompedura, d’un vertadèr cambiament deus apròchis preventius, diagnostics e terapeutics. Alavetz, qué pensar d’aquera medecina navèra?

L’IA que comença d’assistir los mètges e los çurgents desempuish quauques temps tà ajudar a la prescripcion o aus actes medicaus. Quauques exemples.

L’IA e l’ajuda a la prescripcion

Posos qu’escriu peu mètge los contenguts de las ordenanças, qu’identifica las contra-indicacions ligadas au terren deu pacient e mès, que perpausa alternativas a un medicament en rompedura dab la posologia necessària.

Nabla que genèra los comptes-renduts pendent la consultacion en deishar atau mès de temps au medecin tà s’aucupar deu pacient.

L’IA e l’ajuda a la terapia

Breast-SlimView®, un sistèma d’ajuda a la decision clinica brevetat entà la mamografia 2D e 3D. © Breast-SlimView®

IA especializadas que pòden ajudar lo medecin tau diagnostic o tà causir la bona terapia. Per exemple, Breast-SlimView® qu’ajuda au diagnostic deu càncer deu sen, Art-Omics^TM qu’ajuda a la susvelhança: que pòt balhar lo gra d’agressivitat de las cellulas cancerosas a partir d’un imatge en tot hèr relacions estatisticas dab ua grana basa de dadas, etc.

Lo çurgent assistat per ordinator qu’ei mès precís. D’alhors, un produit francés qu’ei a la punta deu progrès en aqueth domeni: Computer Assisted Medical Interventions o CAMI LABEX.

Tot parièr, l’IA que pòt ajudar l’anestesista tà dosar los antibiotics abans e après l’operacion, lutar dab precision contra las nausèas e vomideras pòstoperatòrias deus pacients a bèth risc…

Tsinghua AI Agent Hospital

Liu Yang, Professor deu Departament d’Informatica e de Tecnologia,  Institut de Recèrca de l’IA de l’Universitat Tsinghua

Los Chinés qu’an hame d’IA e que son ambiciós e innovants. L’equipa de Liu Yang, professor de l’universitat –famosa– de Tsinghua (Pekin), que veng d’aviar un espitau gavidat per l’Intelligéncia Artificiau o, mès exactament, un espitau, un centre de formacion e un centre de recèrca. Los objectius que son de melhorar l’accès aus suenhs de qualitat entà tot lo país, de redusir las errors umanas, de portar ua solucion a la manca de medecins (problèma mès important enqüèra en China qu’en França).

Coma se passa?

Lo pacient que veng sense rendetz-vos, un interfàcia que’u recep, qu’escaneriza lo son visatge, que’u reconeish e qu’aubrís lo son dossièr, qu’evalua las suas responsas, las suas posturas, las suas expressions (tà notar paralisias faciaus precòças per ex.), la sua votz tà detectar l’ànsia o la dolor. Qu’a captaders tà conéisher la temperatura, la pression arteriau… De mès, que pòt aviar de tira ua ràdio, ua analisi de sang o un escanèr s’ei necessari. Lo diagnostic que dura de 2 a 5 minutas e qu’ei acompanhat d’un protocòle personalizat de suenh.

Aqueth espitau chinés qu’a quatorze mètges-IA especializats (pneumologia, oftalmologia, radiologia…) capables de diagnosticar, tractar e gerir los suenhs aus pacients de faiçon autonòma, sense intervencion umana. Totun, se lo cas es tròp complicat o se lo pacient muisha emocions tròp hòrtas, lo mètge-IA que manda de tira lo pacient a un uman. Quate infirmièrs-IA que completan l’equipa. Que susvelhan los pacients, los paramètres, qu’alèrtan lo mètge-IA s’ei necessari. Enfin, un sistèma centrau intelligent –lo cap de clinica– que definís las urgéncias, consulta milions d’estudis clinics e auto-ajusta los sons algoritmes.

L’espitau qu’a dejà demostrat la soa eficacitat, en prénguer en carga mès de 3 000 pacients per dia pendent las fasas de tèst. Lo taus de precision deu diagnostic qu’ei de 92 a 97% segon las especialitats, lo temps mejan de tractament redusit de 60%, que nòtan zèro error de medicacion e ua bona satisfaccion deus pacients, sustot deus mès joens. Notem que ne tracta pas cas complèxes coma la psiquiatria o l’oncologia terminau.

Lo centre de formacion-IA

Deu costat deu centre de formacion, aubèrt en 2024, l’IA que genèra cas virtuaus. Atau, los estudiants en medecina que pòden perpausar plans de tractament sense crànher de portar tòrt a pacients reaus. L’universitat qu’anóncia un taus de precision de 93% sus questions de nivèu de licéncia deus USA que pertòcan las malaudias respiratòrias.

Tot aquò n’ei pas navèth entà l’universitat de Tsinghua. En fèit, qu’avèvan dejà bastit ua platafòrma dita Zijing AI Doctoren 2024, un sistèma medicau que permet d’accelerar l’aprentissatge d’agents «intelligents».

De segur, qu’ei tròp de d’òra tà portar un jutjament seriós sus aqueth prumèr espitau-IA. Donc, ne cau pas estar tròp entosiastas e ne cau pas condemnar tròp viste l’ensai. Per exemple, lo taus d’error de l’IA qu’ei feble suus tèsts. Que calerà véser sus temps mès longs.

Los riscs 

La medecina qu’ei ua question de precision tecnica e, tanben, de ligam uman. Pacients que parlan d’ua bona empatia de las IA mes que i a clarament ua desumanizacion deus suenhs. Ua IA pòt comprénguer la páur e trobar la bona faiçon d’i respóner per cadun? Ua IA deu anonciar la mòrt?

Quin risc de discriminacion algoritmica se lo pacient n’ei pas dens los cas de la basa de dadas? E quina responsabilitat sus un problèma de diagnostic?

Coma diminuir la dependéncia tecnologica: bug, ataca informatica, copadura electrica…?

Los desfís de l’IA 

@ AdobeStock

Lo desfís entà la comunautat medicau que serà de gavidar aquera transicion de cap a l’IA de faiçon soscada, en maximizar los avantatges de l’IA, en preservar l’expertesa umana e en assegurar ua relacion pacient-mètge de qualitat.

Qu’ei essenciau de non pas suberestimar l’intelligéncia artificiau en medecina. Coma contarotlar las decisions de l’IA? Que sabem que l’IA ei eficaça tà trobar informacions dens ua basa hidabla de dadas. Totun, aqueras dadas medicaus qu’alimentan los algoritmes que son sovent eterogenèas e mau anotadas. Coma assegurar la lor qualitat? De mès, l’IA n’explica pas las soas decisions, çò que pòt crear incompreensions per un mètge uman o limitar la sua utilizacion futura.

Enfin, las recèrcas e l’utilizacion d’IA que demandan hèra d’energia e que son costosas. Coma non pas accentuar las inegalitats dens l’accès aus suenhs?

Conclusion

L’IA qu’aufrís oportunitats reaus entà melhorar la practica medicau, sustot en hèr créisher l’eficacitat deus diagnostics, en personalizar los tractaments e en facilitar l’accès aus suenhs. Que sembla necessari de l’emplegar coma ua assisténcia: lo pacient qu’ei l’utilizator, l’algoritme l’actor e lo mètge uman lo supervisor. Atau, qu’ei essenciau que l’IA destrie los cas simples que tracta deus cas complicats que dèisha a l’uman. Mès enlà, l’IA que pòt estar ua ajuda màger deu mètge dens cas complicats, en guardar un ròtle clar d’assistent, sense deishar ua tròp grana autonomia a l’IA e en tot reméter en question las suas proposicions. Totun, l’emplec de l’IA, coma l’emplec d’Internet o deu telefonet, que va continuar. E las IA que van evoluar e melhorà’s. Coma guarantir un emplec avisat de l’IA? Ua question a pensar tot viste.

L’IA , l’espitau de l’avénguer? DR

Referéncias

Le premier hôpital entièrement piloté par l’IA inauguré en Chine
Intelligence artificielle et santé, des algorithmes au service de la médecine
L’intelligence artificielle, le droit et la médecine
8 utilisations de l’IA en Médecine